اسلام آباد۔22اگست (اے پی پی) وزیراعظم محمد شہباز شریف آکھیا جو بوناراست کنیکٹیوٹی منصوبہ، تاریخی سنگ میل اے جئیں نال پاکستان دی ڈیجیٹل ادائیگیاں دے انفراسٹرکچر دا ودھارا تھیسی۔ ایں مںصوبے نال تارکین وطن جدید ٹیکنالوجی نال شفاف اتے موثر انداز اچ رقم دی منتقلی کر سڳسن۔ ایں منصوبے نال حوالہ اتے ہنڈی مُک ویسی۔ ترسیلات زر ودھسی اتے کاروبار ودھسن۔ زراعت ، معیشت ، آئی ٹی اتے ٻئے شعبیاں اچ بہتری دے پنج سالہ “ہوم گرائونڈ اکنامک پروگرام ” دا باضابطہ اعلان کریندے پئیوں۔ او خمیس کوں بونا ۔راست کنیکٹیوٹی منصوبے دے نفاذ دی افتتاحی تقریب توں خطاب کریندے پئے ہن۔
انہاں آکھیا جو بوناراست کنیکٹیوٹی منصوبہ پاکستان داپہلاسرحد پار رقوم دی منتقلی دانظام اے جئیں نال عرب ملکاں توں جدید ٹیکنالوجی نال رقم دی منتقلی شفاف اتے موثر انداز اچ تھیسی۔ ایں منصوبے دے نفاذ کیتے وزیر خزانہ ، گورنر سٹیٹ بینک، کار انداز اتے بل اینڈ ملینڈا گیٹس فائونڈیشن دے مشکور ہیسے۔ اے مںصوبہ ٻہوں اہم اے کیونجو ایں نال پاکستان دی ڈیجیٹل ادائیگیاں دا انفراسٹرکچر ودھسی۔ وزیراعظم آکھیا جو اڄ اساں ڈیجیٹل گورننس دے نویں دور اچ ویندے پئیوں۔ ایں تاریخ سنگ میل نال عرب دنیا نال اساݙے تعلقات ٻئے ودھسن۔ ایں منصوبے نال رقم ٻھیجݨ دے غیر روایتی طریقے دا خاتمہ تھیسی۔ ایں مںصوبے نال تارکین وطن جدید ٹیکنالوجی نال شفاف اتے موثر انداز اچ رقم دی منتقلی کر سڳسن۔ ایں منصوبے نال حوالہ اتے ہنڈی مُک ویسی۔ ترسیلات زر ودھسی اتے کاروبار ودھسن۔وزیراعظم آکھیا جو ایف بی آر اچ وݙے پیمانے تے اصلاحات تھیندی پئن جئیں دی میں ذاتی طور نگرانی کرینداں پئیاں۔ ایں کیتے بل ملنڈااینڈ گیٹس فائونڈیشن اتے کار انداز دا مالی تعاون حاصل اے۔ ایندے نال نال اساکوں ݙوجھا چیلنج توانائی دے شعبے دا اے۔ ایندے نال اساں نبڑدے پئیوں اتے آندے کجھ مہینے اچ ایندے نتیجے امسن۔
وزیراعظم آکھیا جو او جلدی ہوم گرائونڈ اکنامک پروگرام دا اعلان کرݨ ویندے پئن ۔ ایں بارے سارے فریقین نال گزریل مہینے توں مشورہ تھیندا پئے۔ اے اساݙا آندے پنج سالیں دا پروگرام ہوسی جو کینویں اساں آپݨی معیشت ، زراعت ، آئی ٹی اتے ٻئے شعبے اچ بہتری ڳھن آوݨی اے۔ وزیراعظم آکھیا جو ڈیجیٹل نظام راست کوں عرب مانیٹری فنڈ دے تحت بونا نال جوڑیا ویندا پئے۔ ایں موقع تے بل اینڈ ملنڈاگیٹس فائونڈیشن دی صدر ڈاکٹر انیتازیدی خطاب کریندیں ہوئیں آکھیا جو اساݙی فاؤنڈیشن دا عزم اے جو دنیا اچ ہر ہک صحت مند اتے زندگی گزار سڳے۔ اساں ساؤتھ ایشیا سودھے پوری دنیا اچ عوام دی زندگی اتے انہاں کوں روزگار ݙیوݨ کیتے تنظیماں اتے حکومتاں نال سانجھے داری تے فخر کریندوں۔ بوناراست کنیکٹیوٹی منصوبے نال ساریاں توں ودھ تریمتیں فیدہ چیسن۔ تقریب توں خطاب کریندیں ہوئیں وفاقی وزیر خزانہ و محصولات محمد اورنگزیب آکھیا جو بوناراست منصوبہ ٻہوں اہمیت رکھیندے۔ وزیراعظم دی قیادت اچ معیشت بہتری آلے پاسے ویندی پئی اے۔ ملک اچ میکرو استحکام امدا پئے۔ پاکستانی روپے دی قدر ٹکدی پئی اے۔ ایں موقع تے وزیراعظم بوناراست کنیکٹیوٹی منصوبے دے نفاذ اچ کردار اتے افتتاحی تقریب اچ شرکت تے چیئرپرسن عرب مانیٹری فنڈ ڈاکٹر فہد الترکی ، گورنر سٹیٹ بینک پاکستان جمیل احمد، ڈاکٹرانیتا زیدی، وقاص الحسن کوں شیلڈپیش کیتی۔
