اسلام آباد۔1جولائی (اے پی پی):وزیراعظم عمران خان آکھیے جو پاکستان چین نال سیاسی، اقتصادی اتے تجارتی تعلقات کوں مضبوط بݨاوݨ چاہندے ، سی پیک بیلٹ اینڈ روڈ اقدام اچ ھک کلیدی منصوبہ اے، سی پیک منصوبیں دا جائزہ گھنݨ کیتے ھک اعلیٰ سطحی کمیٹی بݨائی اے ، اپݨے آندے دورہ چین دا منتظر ہاں، پاکستان اتے چین دے میڈیا وچال نیڑے تعاون ودھاوݨ چاہندوں ، چین دی کیمونسٹ پارٹی اتے قیادت کوں سو سال دی تقریبات تے مبارخ ݙینداں ۔ وزیراعظم اے ڳال چینی میڈیا نال ڳال مہاڑ کریندے ہوئیں آکھیے جو پاکستان اتے چین دے تعلقات نیڑے تے گھاٹے ہن۔ میڈیا اتے ثقافتی تعلقات اتنے نیڑے کائنی جتنے سیاسی ہن ۔ وزیراعظم آکھیے جو چینی میڈیا نال اڄ دی ملاقات دا مقصد میڈیا رابطے کوں ودھارا ݙیوݨ اے ۔پاکستان اچ اساں صدر شی جن پنگ کوں جدید دور دا ھک وݙا سیاستدان تصور کریندوں۔ پاکستانی ݙو لحاظ نال انہاں توں متاثر اے ۔ ھک کرپشن دے خلاف انہاں دی جنگ ، انہاں دی انسداد بدعنوانی دی مہم ٻہوں کامیاب اے اتے پاکستانی ایندے توں ٻہوں متاثر ہن۔ وزیراعظم عمران خان آکھیے جو چین دا ھک ٻیا کارنامہ وݙی تعداد اچ لوکاں کوں غربت اچوں کڈھݨ ۔ چین 70 کروڑ لوکاں کوں غربت توں کڈھیے اے ھک وݙی کامیابی اے تے میݙا خیال اے جو کہیں وی انسانی معاشرے اچ ایجھی مثال نی ملدی ، انہاں آکھیے اساں توں سی پیک منصوبیں دا جائزہ گھںݨ کیتے اعلیٰ سطح دی کمیٹی ٻݨائی اے ۔ میں اڳلے ہفتے گوادر ویندا پیاں ۔ میں اتھاں سی پیک منصوبیں دی کم دی رفتار دا جائزہ گھنساں۔ میں اتھان چینی کارکناں نال ملاقات کریساں ۔ وزیر اعظم عمران خان چین دے مجوزہ دورے دا ذکر کریندے ہوئیں آکھیے جو میں اڳلے ھک ݙو مہینے اچ چین دے دورے دا منتظر ہاں۔ ھک دورے اچ پاکستان تے چین وچال سیاسی اتے اقتصادی تعلقات کوں ودھارا ݙیوݨ تے ڳال کریساں ۔وزیراعظم عمران خان آکھیے جو کمیونسٹ پارٹی آف چائنا (سی پی سی)ھک منفرد ماڈل اے ، اساکوں ہݨ تئیں اے ݙسیا ڳے جو مغربی جمہوریت کہیں وی معاشرے دی ترقی دا بہترین نظام اے لیکن سی پی سی ھک ایجھا متبادل نظام ݙتے جیں سارے مغربی جمہوریتاں کوں ہرائے ، انہاں آکھیے جیں معاشرے اچ حکمران طبقہ دا احتساب تھیوے او میرٹ تے ہووے او کامیاب تھیندے ، ہݨ تئیں اے خیال ہئی جو جمہوریت دے ذریعے حکمران میرٹ تے منتخب تھیندن تے ول ایں قیادت دا احتساب وی کیتا ونڄ سڳدے لیکن سی پی سی انتخابی جمہوریت دے بغیر سارے مقصد بہتر طریقے نال حاصل کیتن ۔ جݙاں میں چین اچ کمیونسٹ پارٹی دے ہیڈکوارٹر دا دورہ کیتا تاں میں ݙٹھے جو انہاں دا ٹیلنٹ کوں ڳولݨ تے ول ایندی تربیت کرݨ دا نظام کہیں وی انتخابی جمہوریت توں چنڳاں ہئی ، جݙاں او کوئی چیز کوں بدالݨ چاہن تاں اے نظام ایندی حمایت کریندے ۔ اساݙے معاشرے اتے حتی کہ مغربی جمہوریت اچ کہیں وی نظام دی تبدیلی ٻہوں اوکھی اے ۔تساں ہمیشہ او نی کرسڳدے جیڑھا معاشرے کیتے بہتر ہووے ۔ چین ایں سانگے اتنی تکھے ترقی کیتی اے او آپݨے نظام اچ تکھیے تبدیلی گھن آندن ۔ جݙاں او سمجھدن جو کوئی نظام کم نی کریندا پیا تاں او اینکوں بدال ݙیندن اتے انہاں لمبی مدت منصوبہ بندی کیتی اے ۔ انتخابی جمہوریت اچ صرف پنج سال دی منصوبہ بندی کیتی ویندی اے ۔ وزیر اعظم آکھیے جو سی پیک دا اڳلا منصوبہ پاکستان کیتے ٻہوں حوصلہ افزا اے ۔ اساں کنے خصوصی اقتصادی زون ہوسن ۔ اساکوں امید اے جو چینی صنعت انہاں خصوصی زونز دے پاسے توجہ کریسی اساں انہاں کوں مراعات ݙیسوں۔ پاکستان اچ لیبر سستی اے اتے توقع اے جو چین دے صنعت کار ایں پاسے توجہ کریسن ۔ چین نال زراعت دے شعبہ اچ تعاون چاہندوں ۔پاکستان بنیادی طور تے ھک زرعی ملک اے تے اساں آپݨی زرعی پیداوار ودھاوݨ تے توجہ نی ݙتی ۔ اساکوں امید اے جو اساں چین کوں جدید زرعی مہارت توں فیدہ چا سڳدوں ، انہاں آکھیے صدر شی جن پنگ اتے وزیراعظم لی کی چیانگ جیں عمل دے ذریعے ایں مقام تئیں پڄن ایں کیتے انہاں 30 سال دی جدوجہد کیتی۔ انہاں وستیاں دی سطح تے جدوجہد شروع کیتی تے آپݨی محنت نال لیڈر بݨیے۔ ایں قسم دا عمل ٻہوں ساری انتخابی جمہوریتاں اچ وی کائنی۔ امریکی صدر کوں ایں قسم دی سخت محنت اتے جدوجہد توں نی لنگھݨا پیا ۔چینی قیادت جݙاں اعلیٰ مقام تے پڄدی اے تاں انہاں کوں ݙھڳ سارا تجربہ تھی چکیا ہوندے ، او نظام کوں پورے طور تے سمجھدن انہاں کوں پتہ ہوندے جو تلویں سطح تے لوک کیویں زندگی گزریندے پئن ۔ ایہا وجہ اے جو او غربت مکاوݨ اچ کامیاب تھیندن ۔ جیویں جو چین کورونا وائرس دی وبا دامقابلہ کیتے او ھک وکھرا ہئی۔ چین جیویں اساݙی مدد کیتی ، ویکسین عطیہ کیتی ، ایں تے اساں چین دے شکر گزار ہیسے۔ چین دے بعد پاکستان او ملک اے جیں چنڳے انداز اچ کورونا وائرس دی وبا دا مقابلہ کیتے۔ چین دی مدد نال اساں آپݨے طبی عملے کوں ویلھے نال ویکسین لاوݨ اچ کامیاب رہ ڳئیوں ۔ پاک چین دوستی بارے ھک سوال دے ولدے اچ وزیر اعظم آکھیے جو پاکستان اتے چین دے تعلقات خصوصی ہن ۔ چین اوکھے ویلھے اساݙے رلے تھیا۔ چین تے ایندے عوام دا پاکستانیاں دے دل اچ ھک خاص مقام اے۔ ھک ٻئے سوال دے ولدے اچ انہاں آکھیے جو چین اتے امریکا دے اختلافات نال اوکھ تھئی ۔ پاکستان سمجھدے جو اے ڳال درست کائنی جو امریکا اتے ٻئیاں مغربی طاقتاں پاکستان جیہے ملکاں کوں کہیں ھک گروپ دا ساتھ ݙیوݨ تے مجبور کرن اساں کیوں کہیں دی سائیڈ گھنوں ۔ اساں ساریں نال چنڳے تعلقات چاہندوں ۔ پاکستان چین دے نال چنڳے تعلقات چاہندے ۔ پاکستان چین دے نال آپݨے تعلقات کوں کݙاہیں گھٹ نہ کریسی ۔ سی پیک توں اساݙا اقتصادی مستقبل جڑیا ہویا اے ۔ وزیراعظم آکھیے جو چین ھک ابھردی ہوئی سپورٹنگ پاور اے۔ جݙاں ادارے مضبوط تھیندن تاں ایں ملک دے کھیڈ کوں وی ودھارا ملدے ۔ چین نال اساݙے 70 سال پراݨے تعلقات ہن۔افغانستان متعلق ھک سوال دے جواب اچ وزیراعظم آکھیے جو ٻہوں اوکھا سوال اے ایں ویلھے کہیں ݙے وی ایندا جواب کائنی ۔ امریکا دی ساریں توں وݙی غلطی اے ھے جو انہاں عسکری قوت نال مسئلہ حل کرݨ دی کوشش کیتی ، افغانستان دی تاریخ ہے جو کوئی افغاناں کوں تابع نی کرسڳیا ۔ جیویں ہی امریکا افغانستان توں نکلݨ دا اعلان کیتے ، طالبان اینکوں آپݨی فتح قرار ݙتے ۔ ایجھی صورتحال اچ انہاں کوں سیاسی حل تے گھن آوݨ ٻہوں آوکھا اے ۔جے افغانستان اچ خانہ جنگی تھیندی اے تاں ایندے نال ساریں توں ودھ متاثر پاکستان تھیسی ۔ ایں سانگے اساں ہر صورت سیاسی حل چاہندوں ۔ وزیراعظم عمران خان دی چینی میڈیا نال ڳال مہاڑ دے موقع تے وفاقی وزیر اطلاعات و نشریات چوہدری فواد حسین اتے وفاقی وزیر منصوبہ بندی ، ترقی و اصلاحات اسد عمر وی موجود ہن ۔
